گفتگوی سران امنیت ملی افغانستان و تاجیکستان درباره همکاری‌های امنیتی

احمدضیا سراج؛ سرپرست ریاست امنیت ملی کشور به تاجیکستان سفر کرده و با مقامات امنیتی این کشور از جمله سیدمومن یتیم‌اف؛ رییس کمیته دولتی امنیت ملی تاجیکستان درباره همکاری‌های امنیتی میان دو کشور گفتگو کرده‌است.blank

رسانه‌های تاجیکستان گزارش دادند که در این دیدار مسایل مربوط به گسترش همکاری دوجانبه در زمینه تامین امنیت در منطقه، صلح و ثبات در افغانستان و سایر مسایل مهم بررسی شده‌است.

همچنین مسایل مربوط به مبارزه مشترک با تروریزم، محافظت از مرز دولتی وجلوگیری از قاچاق مواد مخدر، از دیگر موضوعاتی بوده که طرفین در خصوص آن بحث و تبادل نظر کردند.

سران امنیت ملی دو کشور با توجه به تهدید مستقیم سازمان‌های تروریستی بین‌المللی، از جمله «القاعده»، «داعش»، «انصار الله» و «حرکت اسلامی ترکستان شرقی» بر همکاری‌های دوجانبه امنیتی تاکید کرده‌اند.

طرف تاجیکستانی در این ملاقات از ریاست امنیت ملی افغانستان برای شناسایی و مبارزه بی‌رحمانه علیه گروه‌های تروریستی که با کسب آموزش‌های ویژه دستور انجام اقدامات تروریستی در تاجیکستان را داشتند، تشکر کرده‌است.

از طرفی هم، هردو جانب آمادگی خود را برای تعمیق بیشتر همکاری برای تامین امنیت مرزهای دو کشور در زمینه مبارزه با تروریزم، افراط‌گرایی، قاچاق مواد مخدر و اسلحه اعلام کرده‌ند.

در پایان این دیدار، سرپرست ریاست امنیت ملی افغانستان از نتایج سفر خود به تاجیکستان ابراز رضایت کرده و از رییس کمیته دولتی امنیت ملی تاجیکستان برای انجام سفر به کابل در فرصت مناسب دعوت کرد.

مطالب مرتبط