گفتگوی خلیلزاد با رییس جمهور تاجیکستان در مورد صلح افغانستان

زلمی خلیلزاد؛ نماینده ویژه امریکا در امور صلح افغانستان که به دوشنبه سفر کرده است، با امامعلی رحمان؛ رییس‌جمهوری تاجیکستان دیدار و گفتگو کرد.به گزارش خبرگزاری رسمی تاجیکستان «خاور»، طرفین در این دیدار مذاکرات بین‌الافغانی و تحولات منطقه و جهان را مورد بحث و گفتگو قرار دادند.

رییس‌جمهوری تاجیکستان در این دیدار اظهار داشته که کشورش از مذاکرات بین الافغانی استقبال می‌کند و صلح و ثبات در کشور همسایه افغانستان برای تاجیکستان حایز اهمیت است.

طرفین بر ضرورت همکاری‌ها علیه تروریزم، افراط‌گرایی و مبارزه با قاچاق مواد مخدر نیز تاکید کردند.

خلیلزاد پیش از سفر به تاجیکستان در کابل نیز با مقام‌های حکومت در مورد صلح دیدار و گفتگو داشته‌است.

همچنین پیشتر به ازبکستان سفر رفته و با وزیرخارجه این کشور در نشستی بر تسریع روند صلح افغانستان تاکید کرده بود.

در حال حاضر مذاکرات دولت و طالبان متوقف است.

طالبان به دلیل تاخیر در خروج نیروهای خارجی از افغانستان، نشست‌های صلح را تحریم کرده و در عین حال خشونت را تشدید بخشیده‌اند.