چین در مرز افغانستان برای تاجیکستان پایگاه نظامی می‌سازد
مقام‌های تاجیکستانی اعلام کردند که در نزدیکی مرز این کشور با افغانستان، چین پایگاهی برای پولیس تاجیکستان می‌سازد.
یک سخنگوی پارلمان تاجیکستان، روز پنج‌شنبه (۶ عقرب) به خبرگزاری فرانسه گفته‌است که مجلس سفلی (مجلس نمایندگان) تاجیکستان طرح ساخت این پایگاه را در منطقه اشکاشم در ولایت خودمختار کوهستانی بدخشان تصویب کرده‌است.
او که نخواسته نام‌اش فاش شود، گفته‌است: «همه ساخت‌وسازها توسط طرف چینی تامین می‌شود. پس از ساخت، پایگاه به پولیس تاجیکستان منتقل خواهد شد.»
او اضافه کرده که چین ۸.۵ میلیون دالر (۷.۳ میلیون یورو) به این پایگاه کمک می‌کند.
چین و تاجیکستان در منطقه شمال شرق افغانستان مرز مشترک دارند.
هر دو کشور پس از تسلط طالبان بر افغانستان، نگران فعالیت‌های گروه‌های افراطی در منطقه مرزی خود هستند.
این در حالی است که چین به دنبال ایجاد روابط دوستانه با طالبان پس از تسلط آنها بر افغانستان است.
پکن از این گروه خواسته‌است تا جدایی‌طلبان اقلیت مسلمان اویغور را که به دنبال نفوذ به منطقه مرزی حساس آن در سین کیانگ هستند، سرکوب کند.
تاجیکستان اما برخلاف کشورهای آسیای مرکزی که روابط کاری با طالبان برقرار کرده‌اند، با این گروه دچار تنش شده و به گونه صریح اعلام مخالفت کرده‌است.
با این وجود، امام‌علی رحمان، رییس جمهوری تاجیکستان، نسبت به آنچه مستقر شدن «گروه‌های تروریستی» در امتداد مرز این کشور با افغانستان خوانده، ابراز نگرانی کرده‌است.
