اورآسیا نت: تاجیکستان به تعامل با طالبان روی آورده است

وبسایت تحلیلی اورآسیا نت با نشر مطلب تازه‌ای به بررسی روابط طالبان و تاجیکستان پرداخته و گفته که روابط دوطرف به‌آرامی رو به بهبود است و تاجیکستان به تعامل با طالبان روی آورده است.

وبسایت تحلیلی اورآسیا نت با نشر مطلب تازه‌ای اعلام کرده است که طالبان و تاجیکستان محتاطانه در حال بهبود روابط است و تاجیکستان به دلیل مسائل امنیتی و اقتصادی به تعامل با طالبان روی آورده است.

به گفته این رسانه، طالبان با دعوت از رهبر مخالف حکومت امامعلی رحمان؛ رییس‌ جمهور تاجیکستان، به دنبال ایجاد اهرم فشار بر دوشنبه بوده است.

روابط طالبان و تاجیکستان از سه دهه پیش تاکنون با تنش همراه بوده است.

تاجیکستان از مخالف طالبان حمایت کرده و به آن‌ها پناه داده است.

در همین حال، اورآسیا نت افزوده است که تاجیکستان به دلایل امنیتی و اقتصادی، به تعامل با طالبان روی آورده است.

ملانی سدوزای؛ پژوهشگر دانشگاه رگنزبورگ آلمان، در این باره می‌گوید: «علنی شدن جلسات دوجانبه و توقف انتشار بیانیه‌های تند از سوی مقامات تاجیکستان علیه طالبان، از تغییرات مهم و مثبت به شمار می‌رود.»

نشانه‌های بهبود روابط شامل بیانیه‌های مقام‌های طالبان درباره همکاری با تاجیکستان، سفر هیاتی از تاجیکستان به کابل در تابستان سال گذشته، و بازگشایی بازارهای مرزی از سپتامبر ۲۰۲۳ بوده است.

در همین حال، براساس این گزارش، روابط میان دو طرف همچنین با تناقض‌هایی روبه‌رو است.

تاجیکستان طالبان را گروهی افراطی می‌داند و از مخالفان آن‌ها پشتیبانی می‌کند، در حالی که طالبان نیز از گروه افراطی جماعت انصارالله تاجیکستان حمایت می‌کند.

اورآسیا نت با اشاره به سفر شرف‌الدین گادویف؛ منتقد برجسته رییس‌ جمهور تاجیکستان، به کابل گفته: «سفر گادویف و اظهارات تند او در یک مصاحبه تلویزیونی، که در آن رحمان را دیکتاتور و دولتش را به مافیا تشبیه کرد، نشان‌دهنده بازی دوگانه طالبان است.»

سدوزای معتقد است که طالبان با دعوت از گادویف، اهرمی برای تاثیرگذاری بر روابط خود با تاجیکستان ایجاد کرده است.

بر اساس این گزارش، تاجیکستان تعادل ظریفی برقرار کرده است: از یک طرف، روابط اقتصادی خود را با افغانستان، به‌ویژه از طریق صادرات برق، گسترش می‌دهد، اما به دلیل ملاحظات سیاسی از به رسمیت شناختن طالبان خودداری می‌کند. سدوزای تاکید کرد که به رسمیت شناختن طالبان از سوی تاجیکستان «بسیار بعید» است.

اورآسیا نت همچنین باور دارد که قطع کمک‌های امریکا به افغانستان می‌تواند توانایی طالبان برای پرداخت هزینه برق وارداتی از تاجیکستان را کاهش دهد.

علاوه بر این، نگرانی تاجیکستان از قطع احتمالی کمک‌های امنیتی غرب ممکن است مانع از نزدیکی بیشتر دو طرف شود.