سرپرست وزارت صنعت و تجارت طالبان به ازبکستان رفت

وزارت صنعت و تجارت طالبان اعلام کرده است که نورالدین عزیزی، سرپرست این وزارت، در رأس یک هیأت به ازبکستان سفر کرده است.

وزارت صنعت و تجارت طالبان امروز دوشنبه، ۱۹ جوزا با نشر خبرنامه‌ای اعلام کرده است که نورالدین عزیزی، سرپرست این وزارت، در رأس یک هیأت به منظور شرکت در کنفرانس بین‌المللی تاشکند، به اوزبیکستان سفر کرده است.

بر اساس خبرنامه، هدف از این سفر، شرکت در چهارمین کنفرانس بین‌المللی تاشکند و پیگیری تعهدات قبلی عنوان شده است.

به گفته این وزارت، هیأت طالبان از سوی مقام‌های اوزبیکستانی دعوت شده است.

در خبرنامه آمده است که در حاشیه این نشست، هیأت طالبان با مقام‌های اوزبیکستان و سایر کشورهای شرکت‌کننده دیدار خواهند کرد.

طالبان پس از تسلط مجدد بر افغانستان، روابط تجاری نزدیکی با اوزبیکستان برقرار کرده‌اند.