عبدالله عبدالله وارد شهر داووس سویس شد
عبدالله عبدالله رییس اجراییه که کشور را به مقصد شرکت در نشست مجمع اقتصادی جهان ترک کرده بود صبح امروز وارد شهر داووس سویس شده است.
در اعلامیه که ازسوی ریاست اجراییه به نشر رسیده آمده است که عبدالله عبدالله رییس اجراییه در افتتاح اجلاس مجمع اقتصادی جهان اشتراک و در چندین نشست در باره افغانستان، منطقه و جهان سخنرانی می‌کند.
اعلامیه افزوده رییس اجراییه در نخستین روز کاری مجمع اقتصادی در نشست «صلح و آشتی در جهان چند قطبی» و «آخرین تحولات استراتیژیک در جنوب آسیا» صحبت می‌نماید.
گفته می‌شود در این نشست موضوعات مهم اقتصادی، سیاسی، تغییرات اقلیم در سطح جهان و چگونگی همکاری میان کشورها، سازمان‌های بین‌المللی و سازمان‌ها و نهادهای اقتصادی در عصر جهانی شدن به بحث گرفته می‌شود.
قرار است رییس اجراییه در حاشیه این نشست با تعدادی از نخست وزیران، روسای سازمان‌های بین‌المللی، نمایندگان عالی‌رتبه کشورها و سازمان‌های بین‌المللی دیدار کند.
نشست مجمع اقتصادی جهان با اشتراک بیش از ۳۰۰۰ تاجر، سیاست‌مدار، نمایندگان حکومت‌ها، نهادهای بین‌المللی و جامعه مدنی امروز آغاز می‌شود و برای پنج روز ادامه می‌یابد.
