برف‌کوچ در بدخشان‌ها جان ۲۱ نفر را گرفت
منابع از جان باختن ۱۱ تن بر اثر برف‌کوچ‌های اخیر در بدخشان افغانستان خبر داده‌اند. در بدخشان تاجیکستان نیز ۱۰ نفر بر اثر برف‌کوچ جان باخته‌اند.
به دنبال برف‌باری‌های سنگین در بدخشان افغانستان، در سه روز گذشته بیش از ۱۱ تن جان باخته و ۵ تن دیگر زخمی شده‌اند. در همین حال، منابع محلی می‌گویند که بر اثر برف‌کوچ چهارشنبه‌شب، ۲۶ دلو، در روستای «ماندیز» کوف‌آب چهار عضو یک خانواده جان باخته اند.
در همین حال، رسانه‌های بین‌المللی گزارش داده‌اند که ریزش سنگین برف و سرازیر شدن برف‌کوچ‌ها در بدخشان تاجیکستان هم جان ۱۰ تن را گرفته‌است.
رویترز با نشر گزارشی گفته که این برف‌کوچ‌ها در منطقه شرقی گورن بدخشان تاجیکستان رخ داده است.
کمیته اضطراری تاجیکستان اعلام کرده که در یکی از این برف‌کوچ‌ها چندین ساختمان مسکونی در مرکز خاروق بدخشان ویران شده که در نتیجه آن ۸ تن کشته شده‌اند.
به گفته این کمیته، در رویدادی دیگر، بر اثر سرازیر شدن برف‌کوچ در شهر ونج‌منجر تاجیکستان دو تن کشته شده‌اند.
این در حالی است که بدخشان‌های افغانستان و تاجیکستان از بخش‌های کوهستانی و سردسیر دو کشور محسوب می‌شوند.
