طالبان: کارمندان ریاست نظارت تعلیمی از وظیفه سبک‌دوش نمی‌شوند
در حالی‌که با حذف بست «ریاست نظارت تعلیمی» از تشکیلات وزارت معارف توسط طالبان،کارمندان آن در ۳۴ ولایت بیکار شده‌اند، اکنون معاون سیاسی طالبان می‌گوید هیچ کارمند این وزارت از وظیفه سبک‌دوش نمی‌شود.
ارگ تحت کنترل گروه طالبان امروز دوشنبه(11 جدی) در اعلامیه ای گفته که مولوی عبدالکبیر معاون سیاسی این گروه، با شماری از کارمندان، ریاست نظارت تعلیمی مرکز و ولایات دیدار کرده است.
مولوی عبدالکبیر معاون سیاسی گروه طالبان، در دیدار با شماری از کارمندان ریاست نظارت تعلیمی مرکز و ولایات این گروه گفته که بر اساس پالیسی این گروه، هیچ کارمند وزارت معارف از وظیفه سبک‌دوش نمی‌شود.
این طالب ادعا کرده که به اساس پالیسی امارت طالبان، هیچ‌کارمند در وزارت معارف از وظیفه‌اش سبک‌دوش نمی‌شود و در صورت تغییرات در جاهای مناسب دیگر توظیف خواهند شد.
گفتنی است که بر اساس گزارش رسانه ها بعد از حذف بست‌های ریاست نظارت تعلیمی از تشکیلات وزارت معارف، کارمندان آن در ۳۴ ولایت بیکار شده‌اند.
پیش از این حدود پنج هزار نفر در ریاست نظارت تعلیمی در کابل و آمریت‌های مربوط آن در ۳۴ ولایت افغانستان مشغول بررسی کیفیت آموزشی در مکاتب دولتی و خصوصی بودند.
طالبان پیش از این در تغییراتی که در تشکیلات وزارت معارف افغانستان آورده بودند، ریاست نظارت تعلیمی را از بدنه معینیت تعلیمات عمومی به زیر مجموعه‌های ریاست تربیت معلم منتقل کرده بودند.
کارمندان وزارت معارف می‌گویند اکنون در تغییرات تازه، این ریاست به‌گونه کامل از تشکیلات وزارت معارف حذف شده است.
