تامین بودجه مدیریت مرزی تاجیکستان با افغانستان از سوی جاپان

در حالی‌که کشورهای منطقه به‌ویژه تاجیکستان همواره از قاچاق مواد مخدر و حضور گروه‌های تروریستی در افغانستان تحت حاکمیت طالبان ابراز نگرانی کرده‌اند، جاپان اعلام کرده است که بودجه مدیریت مرزی تاجیکستان با افغانستان را تامین می‌کند.

برنامه توسعه‌‌ای سازمان ملل متحد در تاجیکستان اعلام کرده است که دولت جاپان از طریق آژانس همکاری بین‌المللی‌اش (جایکا) بودجه پروژه «مدیریت مرز» تاجیکستان با افغانستان را تامین می‌کند.

جلوگیری از قاچاق مواد مخدر از افغانستان به تاجیکستان و تسهیل تجارت فرامرزی از اهداف این پروژه عنوان شده است.

بربنیاد این گزارش، پروژه «مدیریت مرز» در اوایل سال ۲۰۱۵ راه‌اندازی شده بود و تا سال ۲۰۲۵ ادامه خواهد داشت.

از زمان آغاز این پروژه تا کنون دو طرف یک ایست بازرسی مرزی جدید در «لنگر» ساخته‌اند و ایست‌های بازرسی قدیمی در «خمروگی و شوگون» را نیز مجهز کرده‌اند.

این در حالی است که کشورهای منطقه به‌ویژه تاجیکستان همواره از قاچاق مواد مخدر و حضور گروه‌های تروریستی در افغانستان زیر تسلط طالبان ابراز نگرانی کرده است.

در تازه‌ترین مورد، آژانس کنترل مواد مخدر تاجیکستان روز دوشنبه، ۱۶ دلو در گزارشی گفته است که به‌رغم ادعای طالبان مبنی بر کاهش قاچاق مواد مخدر از افغانستان، هیچ نشانه‌ای از آن نمی‌بیند.

براساس این گزارش، تولید مواد مخدر در آزمایشگاه‌های مخفی در افغانستان آغاز شده است و این مواد در نخست به تاجیکستان قاچاق شده و پس از آن به کشورهای دیگر منتقل می‌شود.