تاجیکستان جنگلات مرزی افغانستان را آتش زد
منابع محلی در ولایت تخار می‌گویند که تاجیکستان جنگلات مناطق مرزی با افغانستان را آتش زده است.
منابع مردمی در تخار گزارش داده‌اند که نیروهای مرزی تاجیکستان روز شنبه، ۴ حمل بخش‌هایی از جنگلات ولسوالی‌های دشت قلعه و درقد ولایت تخار را به آتش کشیده‌اند.
به گفته منابع، نیروهای مرزی تاجیکستان، این کار را به منظور جلوگیری از ورود قاچاقچیان مواد مخدر و گروه‌های مسلح از خاک افغانستان به آن کشور انجام داده‌اند.
منابع افزوده‌اند که قاچاقچیان با استفاده از این مسیر از مسیر روستاهای بوستان ولسوالی درقد و بخش‌هایی از ولسوالی دشت قلعه ولایت تخار، مواد مخدر را به تاجیکستان انتقال می‌دهند.
به گفته منابع، هر از گاهی در این مسیر، درگیری‌هایی نیز میان نیروهای مرزی تاجیکستان و قاچاقچیان رخ می‌دهد.
این در حالی است که در پی رویدادهای تروریستی اخیر در منطقه و افغانستان، اتباع تاجیکستانی عضو داعش، عوامل این حملات معرفی شده‌اند.
همزمان رشد روزافزون تروریست‌های خارجی در افغانستان نگرانی‌های گسترده کشورهای منطقه و سازمان‌های بین‌المللی را برانگیخته است.
اخیرا طرح مستحکم‌سازی امنیت مرزهای تاجیکستان با افغانستان در سازمان پیمان امنیت جمعی تصویب شد.
