طالبان: اتباع تاجیکستان برای پول به داعش می‌پیوندند
رسانه‌های نزدیک به طالبان ادعا کرده‌اند که اتباع تاجیکستان برای به دست آوردن پول مجبور به پیوستن به داعش شده‌اند.
رسانه المرصاد وابسته به اداره استخبارات طالبان مدعی شده است که شهروندان تاجیکستان برای به دست آوردن پول مجبور به پیوستن به صف‌های داعش شده‌اند.
این رسانه همچنین گفته که وضعیت بد اقتصادی در تاجیکستان منجر به آن شده است که گروه داعش از این وضعیت سوء استفاده کند.
المرصاد مدعی شده است که بخش زیادی از اعضای داعش را شهروندان تاجیکستان شامل می‌شود.
این رسانه طالبان گفته است که براساس گزارش منتشرشده در نیویورک‌تایمز، نیمی از اعضای شاخه خراسان؛ تاجیک هستند، از سال ۲۰۱۴ تا ۲۰۱۹ دو هزار تاجیک در سوریه و عراق به داعش پیوسته‌اند، در حملات داعش به مسکو، افغانستان و برخی دیگر از کشورهای منطقه، بارها اتباع تاجیک دستگیر شده‌اند، این افراد ادعا کرده‌اند که به دلیل مجبوریت‌ها پیشنهادهای مالی بالای داعش را پذیرفته و به این گروه پیوسته‌اند.
المرصاد همچنین مدعی شده است که محدودیت های مذهبی در تاجیکستان منجر به پیوستن شهروندان تاجیکستان به داعش شده‌اند.
این رسانه همچنین سیستم سیاسی تاجیکستان را «دیکتاتوری» خوانده که منجر به جذب جوانان این کشور به داعش شده است.
این مقاله در حالی منتشر می‌شود که داعش مسئولیت حمله به خلیل‌الرحمان سرپرست وزارت مهاجرین طالبان را برعهده گرفت.
این حادثه منجر به زیر سوال رفتن ادعای امنیت طالبان شد.
طالبان همواره مدعی شده‌اند که داعش در افغانستان حضور فیزیکی ندارد.
این گروه بدون آنکه نامی از کشور خاصی ببرد می‌گوید که داعش در کشورهای همسایه پناهگاه دارند.
