اتمر به تاجیکستان رفت

محمدحنیف اتمر؛ سرپرست وزارت امور خارجه، امروز (پنج‌شنبه، ۲۷ سنبله) در راس یک هیات بلندپایه دولتی عازم تاجیکستا‌‌‌ن شد. یکی از اهداف این سفر، زمینه‌سازی برای دیدار رییس جمهوری از دوشنبه است.وزارت خارجه می‌گوید، این سفر دو روزه به دعوت رسمی تاجیکستان انجام شده‌است.

طبق اعلامیه‌ وزارت خارجه، اتمر در این سفر با امام‌علی رحمان؛ رییس جمهوری، قاهر رسول‌زاده؛ نخست‌وزیر، سراج‌الدین مهرالدین؛ وزیر خارجه و سید مؤمن یتیم‌اوف؛ رییس کمیته‌ دولتی امنیت ملی تاجیکستان دیدار می‌کند.

در این اعلامیه آمده‌است که محور دیدار اتمر با مقام‌های تاجیک، تقویت هرچه بیش‌تر روابط دو کشور در بخش‌های امنیتی و مرزی، ترانسپورت، سرمایه‌گذاری، تجارت، ترانزیت و انرژی خواهد بود.

گفتنی‌ است که رییس‌جمهوری تاجیکستان چندی پیش در گفتگویی تلفونی رییس‌ جمهور غنی را نیز به دوشنبه دعوت کرده‌بود.

ارگ ریاست گفته‌بود که پیش از سفر رییس جمهوری به تاجیکستان هیاتی به رهبری اتمر به آن کشور سفر خواهد کرد تا زمینه دیدار او از دوشنبه را فراهم کند.