محموله کمک‌های بشردوستانه ازبیکستان به بلخ رسید

مقام‌های محلی طالبان در ولایت بلخ اعلام کرده‌اند که یک محموله‌ی ۱۶۰ تُنی کمک‌های بشردوستانه ازبیکستان از طریق بندر حیرتان به این ولایت رسیده‌است.

این محموله امروز پنج‌شنبه، 6 ثور از سوی مقام‌های ازبیکستانی به مقام‌های طالبان در ولایت بلخ تسلیم داده شده‌است. این کمک‌ها شامل آرد، روغن، گندم، شکر و گوشت است.

الوغ‌بیک قاسم‌اف؛ والی ولایت «سرخان دریا»ی ازبیکستان هدف از ارسال این کمک‌‌ها را حمایت و دست‌گیری از مردم افغانستان بیان کرده و بر گسترش روابطه حسنه میان دو کشور تاکید کرده است.

او گفته است که این کشور به کمک‌های بشردوستانه به مردم افغانستان ادامه می‌دهد. ازبیکستان پیش از این هم کمک‌های بشردوستانه برای مردم افغانستان فرستاده است.