تاجیکستان ۵۴ شهروندش را از ووهان چین بازگرداند

دولت تاجیکستان از بازگرداندن ۵۴ شهروند این کشور با یک پرواز اختصاصی از شهر ووهان چین به «دوشنبه» خبر داد.

بر بنیاد اعلام دولت تاجیکستان، از میان ۵۴ شهروند بازگردانده شده از ووهان چین، ۴۵ نفر از آن‌ها را دانشجویان تشکیل می‌دهند که صبح امروز سه‌شنبه، ۱۱ فبروری با پرواز چارتر شرکت هواپیمایی «سامان‌ایر» از چین به «دوشنبه» بازگردانده شده‌اند.

هواپیمای مذکور صبح امروز در فرودگاه نظامی «عینی» فرود آمد و همه شهروندانی که از ووهان چین به دوشنبه بازگشتند و همچنین داکتران، کارمندان کمیته شرایط اضطراری و خدمه هواپیما، در مجموع ۶۳ نفر، برای مدت ۲ هفته‌ای قرنطینه شدند.

به این ترتیب، دو هفته تمام این افراد در مرکز«هارانگون» واقع در ۱۵ کیلومتری شمال شهر دوشنبه تحت نظارت داکتران قرار خواهند گرفت.

پرواز چارتر شرکت سامان ایر تاجیکستان روز گذشته با هدف بازگرداندن شهروندان این کشور از دوشنبه عازم چین شده بود.

هواپیمای مذکور همچنین حامل یک محموله بشردوستانه متشکل از تجهیزات طبی بود که تحویل طرف چینی شد.