وزیر داخله تاجیکستان: ۱۰ هزار شبه نظامی در مرز افغانستان و این کشور فعالیت دارند
وزیر داخله تاجیکستان گفته است که بیش از ۱۰ هزار شبه نظامی در مرز افغانستان با این کشور فعالیت دارند.
به گزارش افق رمضان رحیم زاده وزیر امور داخله کشور تاجیکستان امروز شنبه ۲ دلو ۱۳۹۵ در نشست خبری گفته است: « با در نظر داشت وضع پیچیده امنیتی در افغانستان محاسبه دقیق تعداد شبه نظامیان در منطقه مرزی ناممکن است اما براساس برآوردی که ازسوی ما انجام شده است تعداد شبه نظامیان در مرز افغانستان و تاجیکستان بین ۱۰ تا ۱۵ هزار نفر میرسد».
وزیر داخله تاجیکستان فعالیت شورشیان را در مرز دو کشور نگران کننده توصیف کرده است.
او گفته با وجود وضع دشوار و پیچیده در افغانستان، تاجیکستان با این کشور برای کنترول مرزی همکاری دارد.
این مقام تاجیکستان تایید کرده که شهروندان این کشور در صف شورشیان در افغانستان فعالیت میکنند.
خاطر نشان باید کرد که وزیر داخله تاجیکستان و افغانستان در ۲۲ میزان سال روان در نشستی در شهر دوشنبه وضعیت امنیتی مرزهای دو کشور را بررسی کردند.
در آن نشست آقای رحیم زاده در دیدار با تاج محمدجاهد همتای افغانی خود بر لزوم تلاش دو کشور برای مبارزه مشترک با گروههای مسلح و قاچاقچیان مواد مخدر تاکید کرده بودند.
آقای رحیم زاده و جاهد در آن دیدار درباره موضوعاتی از جمله مبارزه با تروریسم افراطگرایی و قاچاق سلاح نیز صحبت کردند.
صحبتهای وزیر امور داخله تاجیکستان چند روز پس از صحبتهای عبدالقیوم کوچی سفیر افغانستان در مسکو منتشر میشود .
آقای کوچی در صحبتهای چند روز پیش خود گفته بود که مافیایی بزرگی در تاجیکستان و روسیه برای انتقال مواد مخدر فعالیت دارد که این گفته سفیر افغانستان در مسکو خشم دولت تاجیکستان و روسیه را برانگیخت و با واکنشهای تند مقامهای این دو کشور روبرو شد.